Багданаў: не дапусцім празмернага росту цэн на прадукты харчавання

31 студзеня, Мінск. У Беларусі не дапусцяць празмернага росту цэн на прадукты харчавання, паведаміў міністр антыманапольнага рэгулявання і гандлю Аляксей Багданаў у эфіры тэлеканала СТБ, паведамляе БЕЛТА.

"Мы прадоўжым і далей кантраляваць (каб не дапусціць празмернага росту цэн. - Заўвага БЕЛТА). У свеце цэны на прадукты харчавання прадаўжаюць расці, і пакуль гэта тэндэнцыя не супакойваецца ў сусветным маштабе. Але дапусціць сітуацыі, каб наш грамадзянін не змог купіць які-небудзь тавар, мы, вядома, не можам, гэта наша сацыяльная адказнасць, гэта наша сацыяльная работа", - сказаў Аляксей Багданаў.

Таму міністэрства і ўрад будуць прадаўжаць кантраляваць цэны і выканаюць тую задачу, якую паставіў кіраўнік дзяржавы, - даць зарабіць усім. "І вытворца не павінен пацярпець, і гандаль павінен быць у прафіце, і самае галоўнае - каб спажывец змог купіць гэты тавар. Задача - трымаць такі баланс, каб не пацярпеў спажывец", - адзначыў міністр.

Гаворачы пра харчэмбарга, Аляксей Багданаў заўважыў, што "ў нас па мерах у адказ праблем у прынцыпе няма". "Усё, што трапіла пад санкцыі, мы практычна на 90 працэнтаў і так замяшчаем нашай вытворчасцю. Асноўная праблемная група была агароднінная і фруктовая - тое, што не вырабляецца ў нашай краіне па кліматычных умовах. Нашы гандлёвыя арганізацыі, пасрэднікі, якія пастаўлялі, - малайцы, яны знайшлі гэту групу тавараў за мяжой і пастаўляюць да нас, і мы ўжо наладзілі гэтыя працэсы", - сказаў ён.

БЕЛТА